BUTUAN CITY – Nakuha sa Barangay Doongan ning siyudad sa Butuan ang pasidungog nga Outstanding Lupong tagamapayapa sa highly urbanized city category sa regional nga level.
Tungod niini, ang maong barangay na ang entry sa nasyunal sa nasangpit nga competition nga gipasi-ugda-an sa Department of Interior and Local Government kon DILG.
Sigon ni Barangay Doongan Kapitan Bert Enriquez, dugay nang katuigan nga wala nasakmit sa dakbayan ang pasidungog human ang grandslam nga nakuha sa Barangay San Vicente.
Niadtung 2015, nahimo lang silang First Runner Up apan sa evaluation sa nakalabay’ng tuig, 2016, nakasakmit kini sa Barangay Doongan base sa gipagawas nga notice sa DILG.
Gitabangan gelayon sila sa pagfacilitate sa ilang entry ngadto sa nasyunal aron makab-ot ang standard sa rikisitos ug sa karun, gipaabot nalang ang resulta sa maong search.
Gipasabot nalang sa kapitan nga lakip sa basehan niini ang epektibong pagpatuman sa Lupong Tagamapayapa Program nga kinahanglang 80 porsiento sa mga kaso nga gi-sang-at sa Barangay, masolbad.
Sa Barangay Doongan, dunay 197 ka kaso sa tibook tuig 2016 diin 195 niini ang ilang nasolbad.
Tumong matud pa sa maong programan nga maminusan ang problema nga atubangon sa mga korte sa tibook nasud tungod kay nasolbad naman kining daan sa barangay palang nga lebel.
Samtang gi-angkon usab sa kapitan nga ang kaso tungod sa tsismis maoy pinakalisud nga solbaron, hinungdang nagduso sila ug Anti-tsismis ordinance nga gikatakda nilang plantsahon sa mas daling panahon.
