BUTUAN CITY – Ipa-abot sa Butuan City Police Station 1 sa Firearm Explosive Security Agencies and Guard Section (FESAGS) ang kalapasang nahimo sa usa ka gwardiya uban sa iyang ig-agaw kinsa nakuhaan og mga lisensyadong armas samtang anaa sa usa ka balay-imnanan.
Naila ang mga suspek nga sila Marjun Torres og ang ig-agaw niining gwardiyang si Don Mark Juan nga parehong taga-Brgy. Ong Yiu ning siyudad.
Nakuha gikan sa ilang posisyon ang kalibe 38 og 9mm nga mga pistola.
Sigon ni P/Sr. Insp. Agustin Navarro, padayon pa ang ilang pag-imbestigar sa maong hitabo human nasuta nga lisensyado ang maong mga armas nga gipanag-iyahan sa usa ka security agency.
Giproseso na matud pa sa ilang buhatan ang gikinahanglang mga dokumento batuk sa kalapasang nahimo sa mga suspek alang sa ipakanaog unyang administratibong lakang sa FESAGS.
Nasuta pa nga gibiyaan ni Juan ang iyang gibantayang pwesto aron lang musulod sa maong balay-kalingawan. (Beth Ruiz)
