2 ka rebeldeng NPA patay og NPA camp na-ilog sa militar human ang engkwentro sa Agusan del Sur
BUTUAN CITY – Padayon pang gi-ila sa mga otoridad ang identity sa duha ka mga rebeldeng New People’s Army kon NPA nga napatay sa 35-minutong engkwentro tali sa tropa sa kagamhanan kagahapon sa bukirang bahin sa Brgy. Mahagsay, San Luis, Agusan del Sur.
Sigon ni P/Sr. Insp. Emerson Bajao – hepe sa San Luis Municipal Police Station, na-ilog sa mga sakop sa 26th Infantry Battalion, Philippine Army sa pagpanguna ni Staff Sgt. Pascual og sa mga CAFGU members sa maong barangay, ang kampo sa mga rebelde nga duna’y 70 ka mga wooden bunkers sa gihimo nilang tunnel.
Apil sa narekober ang usa ka 30-caliber firearms nga duna’y telescope, 50 rounds sa bala sa M60, mga bala sa M14 armalite rifles, 35 ka sakong bugas, napulo ka mga back packs og mga subersibong dokumento.
Dugang pa sa opisyal, naglusad og combat patrol ang composite team sa 26th IB og mga CAFGU members pasado alas-3:30 sa hapon dihang ilang na-engkwentro ang gibana-banang 70 ka mga armadong rebelde pagpanguna ni Ka Antoy kinsa padayon pang gigukod sa kasundaluhan. (Beth Ruiz)
