BUTUAN CITY – Gi-andam na sa Philippine Drug Enforcement Agency kon PDEA-Caraga ang mga tukmang kasong ipasaka batuk sa lima ka mga indibidwal nga nasikop atol sa girondang drug den kagahapon sa Roxas Extension, Little Tondo, Surigao City.
Naila ang mga nadakpang sila Renato Caneja, 38-anyos, minyo, empleyado sa drug den og anaa sa watchlist sa maong ahensya, Jovelyn Caneja, 42-anyos, byuda, nagsilbing drug den maintenance, Philip Antallan, 27-anyos, parehong residente sa maong dapit ingon man ang ilang mga bisita nga sila Michael Quemada, 29-anyos, ulitawo, residente Purok 1, Doña Helen, Brgy. Basilisa, Surigao City og Cyrus Ybañez, 28-anyos, ulitawo, residente sa Poblacion, Brgy. Uhaw, General Santos City.
Nakuha gikan sa ilang posisyon human ang raid kagahapon sa alas-3:30 sa hapon ang balor 295-mil pesos nga suspected shabu uban sa mga shabu paraphernalia og mga gamit nga pang-repack.
Gipa-ilalom na sa screening examination ang mga urine samples sa mga nadakpan aron masuta kung migamit ba sila og ginadiling druga o wala apil na ang confirmatory testing sa gibana-banang 25-gramos sa gidudahang shabu. (Beth Ruiz)
