BUTUAN CITY – Wala damha ni Leonora Herana alyas Delia nga taga-Brgy. Taligaman ning siyudad nga ang iyang entry maoy mukampyon sa Kagahapon Lamang ‘Light at the End of the Tunnel’ program dinhi sa Bombo Radyo Butuan.
Gibutyag ni Herana nga tumong lang sa iyang pagpadala sa istorya sa iyang kinabuhi mao ang pagpa-ambit lang niini ngadto sa mga tigpaminawan og wala sa iyang huna-huna nga makadawat diay siya og 10-mil pesos nga ganti kansa iyang gikonsidera nang bonus.
Nasayrang unod sa sulat ni Herana ang pagka-ilo nilang siyam ka managsoon niadtong grade 4 pa siya human namatay ang ilang amahan. Isip ikapito sa managsoon, apil siya sa naka-undang pagtungha aron lang mutabang sa ilang inahan nga mangumoy-kumoy alang sa ilang panginabuhian.
Nakatiwas lang siya pagtungha human nagdesisyong mag-working student hangtud na sa kolehiyo kondiin gisulayan pa siya sa iyang among lalaki nga makigrelasyon aron lang matabangan sa iyang pagtuon.
Ang wala paghunong sa iyang among lalaki maoy nakapa-aghat kaniya nga isumbong kini ngadto sa iyang among babaye hinungdan nga siya gipalayo.
Tungod matud pa sa iyang kamatinud-anon, padayon siyang gisuportahan sa iyang among babaye sa iyang pagtungha hangtud nga siya naka-graduate.
Naminyo siya og nakabaton og upat ka mga anak nga pulos na mga professionals og haruhay na sa ilang kinabuhi og mitabang na usab kaniya aron magpuyong haruhay.
Nagsunod kaniya si Fidela Alforque sa Brgy. Ampayon nga nakadawat og 7-mil, 500 pesos og ikatulo si Nelly Bulambot sa Brgy. Calibunan, Cabadbaran City nga nakadawat og 5-mil pesos. (Beth Ruiz)
