BUTUAN CITY – Padayon karun ang imbestigasyun sa Philippine Coastguard kon PCG-Surigao sa usa ka pumpboat nga nasunog kagahapon sa alas 7:30 sa buntag sa bisinidad sa Barangay Danawan, Surigao City.
Sigon ni PO2 Diseree Rosal sa PCG-Surigao, ang maong bangka dunay kargang 10 ka containers nga puno sa 300 ka litro sa gasolina ug laing 300 liters usab sa diesel.
Nag-gikan matud pa kini sa baybay sa Barangay San Juan, sa maong dakbayan ngadto na unta sa Barangay Tag-abaka, Dinagat Island sa dihang kini nasunog.
Luwas na hinoon sa makuyaw nga kahimtang ang duha ka sakay niini nga sila Manny Ranie, 38-anyos ug Kit Barriga, 30-anyos nga parehong residente sa Tag-abaka, Dinagat island human naka-ambak apan nakahi-agum gihapon ug mga paso sa tiil ug kasamtangan karung anaa sa Caraga Regional Hospital.
Nasayrang walay dokumento nga ipakita ang duruha isip pamatood nga legal ang ilang pag-transport sa produktong lana.
Giklaro pa ni PO2 Rosal nga kinahanglang mangayu ug notification gikan sa PCG ang bisan kinsang mag-karga sa maong produkto.
