BUTUAN CITY – Miapela si Sister Lyn Glendro, usa ka madre nga taga Agusan Del Sur, kang Pangulong Rodrigo Duterte nga mahatag na sa iyang inahan ug sa silingan niini nga parehong mga centennarians ang incentives gikan sa gobyerno.
Base sa R.A. 10868 o Centenarians Act of 2016, makadawat ang muabot sa usa ka gatus anyos nga Filipino ug 100,000 pesos isip “centenarian gift” apil na ang pag-ila sa pang-gamhanan.
Sigon ni Sister Glendro nga nagpakitabang sa Bombo Radyo Butuan, niadtong 2015 pa niya gi-asikaso ang mga papers sa iyang inahang si Coronacion Glendro, nga gipanganak niadtong 1915 ug karun 101 years old na ug 116 years old usab nga si Barbara Navarro, nga gipanganak niadtong 1905, pareho kini anaa sa Barangay Poblacion, Trento, Agusan Del Sur apan hangtud sa karun, wala pa kini nadawat.
Dakong tabang matud pa ang madawat nga cash incentives sa duha ka centennarians para sa ilang gatas, tambal ug pagkain.
Sa karun, social pension lang nga 500 pesos sa kada buwan ang madawat sa mga niini gikan sa Department of Social Welfare and Development kon DSWD isip mga senior citizen.
Gipahayag pa sa madre nga ang iyang inahan, makalakaw pa kung dunay baston apan si Navarro, makalingkod na lang kung kini alsahon.
Sa pagkutlo ning balita, napaabot na sa DSWD ang maong isyu.
