BUTUAN CITY – Wala’y natalang absences ang 14th Sangguniang Panlungsod secretary ning siyudad sa Butuan atol sa mga regular sessions sa unang kwarter ning tuiga nga gihimo sa mga membro konseho.
Base sa record ni SP Secretary Aurora Caballes niadtong Enero hangtud Marso ning tuiga, ang membro sa konseho nga wala sa ilang sesyon, natala nga duna’y gitambungang official business sama kang Vice Mayor Jose ‘Joeboy’ Aquino II.
Sa eksklusibong interview sa Bombo Radyo Butuan, gikumpirma ni Konsehal Glenn Carampatana – chairman sa Committee on Education sa konseho, ang ilang perfect attendance sa kada-sesyon gawas niadtong duna’y tambungang opisyal nga lakaw.
Iyang gibutyag nga mahinungdanon ang pagtambong sa mga sesyon tungod kay kini ang basehan sa katawhan pagtan-aw sa kamatinud-anon nila sa ilang pagserbisyo sa katawhan apil na ang pagpanday sa balaud kansa mahimo lang kung perpekto ang attendance atol sa ilang regular session.
Sa iyang kabahinan, gipasigarbo ni Konsehal Carampatana nga usa sa iyang nahimo sulod sa halos usa ka tuig sa iyang pagserbisyo mao ang pagmugna og bag-ong buhatan nga mao ang City Education, Literacy and Scholarship Office.
Iyang gipasabot nga tumong niini nga duna’y ka-abag si Mayor Ronnie Vicente Lagnada sa pagpatuman sa mga programa alang sa edukasyon sa kabatan-unan ning siyudad. (Beth Ruiz)
