BUTUAN CITY – Palutawon sa Land Traffic Transportation and Management Office kon LTTMO ang motoristang gikutungan matud pa sa usa sa iyang mga traffic enforcers aron maklaruhan ang kamatu-uran sa mitumaw karong isyu diha sa social media.
Kini subay na sa gika-ingong nakuhaan og hulagway ang maong enforcer nga nangilkil sa driver sa usa ka multicab.
Sa pakighinabi ning sibyahan, gihagit ni LTTMO acting head P/Chief Insp. Peter Paul Manatad, ang gika-ingong gikilkilan nga driver nga mupatim-aw sa iyang buhatan aron masuta niya kung kinsa ang n agsulti sa matuod ilabina nga dili magtakdo ang alegasyon sa rason nga gipagawas usab sa iyang enforcer.
Base sa iyang inisyal nga pakususi, lisensya matud pa ang gikuptan sa maong enforcer nga nakuhaan og hulagway og dili kwarta apan sa panig usab sa nabiktima, gipalip-itan matud pa sa lisensya ang maong kwarta.
Kung mapamatud-ang nangilkil ang iyang sakop, dili na matud pa niya dugayon pa ang pagtangtang niini aron mahulipan og tarong nga enforcer nga maoy gusto niyang magtunhay diha sa kadalanan.
Sukad sa iyang pagdala sa LTTMO, karon pa siya nakabagat niini nga hitabo kondiin gi-upload sa social media ang maong alegasyon.
Apan sa ngalan sa due process, kinahanglan matud pang iplastar ang tanan sa rasong basin og binuhatan lang kini sa mga drivers nga dili gustong magpakorehi sa ilang sayop sa balaud sa trapiko diha sa kadalanan. (Beth Ruiz)
