BUTUAN CITY – Nagmalapuson ang tinuig nga kompetisyon sa Department of Education kon DepED-Caraga aron pangandaman ang pagpili sa mahimong representate o contestant ning rehiyon alang sa national level nga Mathematics Teacher Association of the Philippines kon MTAP DepEd Math Challenge.
Sumala ni Elizalde Bernalez, Public Information Officer sa DepED Caraga sa pakighinabi ning sibyahan, kini na ang ika-16 ka tuig nga pagpahigayon sa nasangpit nga kompetisyon kansa gipangunahan sa usa ka pribadong bangko og sa Mathematics Teachers Association of the Philippines kon MTAP.
Tumong niini ang pagpalambo pa sa kalidad sa matematika nga edukasyon sa tibook pilipinas susama na lamang sa pagpukaw sa gibag-ong interes sa matematika sa matag-elementarya ug sekondaryang lebel.
Gawas pa kini sa pagdasig kanila aron mapaningkamutan ang kahamili sa natad sa matematika og ang pagdiskobre sa talento sa matematika diha sa mga magtutungha.
Gidugang pa sa opisyal nga mas mapalambo pa sa maong kompetisyon ang hiyas sa mga estudyante sa pagpaningkamot, pagkamaoinantuson, pagtamod, ug pagtinabangay lakip na ang sportsmanship.
Gilangkuban ang maong kompetisyon sa ubay-ubay nga mga kategorya nga gilangkuban sa mga magtutungha gikan sa pribado ug publiko nga mga tulunghaan.
Aminado ang opisyal nga dunay mga schools divisions ning rehiyon ang wala’y representante gumikan kay wala kini mi-qualify hinuon gipaneguro niini nga gitinguha sa nasangpit nga buhatan nga makasakmit ang Caraga og medalya hangtod sa nasyunal nga lebel.
Ipahigayon ang nasyunal nga kompetisyon karung Abril 21 hangtud 22 dungan sa palarong pambansa. (Kris Maravilla)
