BUTUAN CITY – Malaumon gihapon ang mga historians ning dakbayan sa Butuan nga magmadaugon sila sa gipangusgang dinhe sa siyudad nahitabo ang unang misa ni Magellan sa Pilipinas.
Kini ang gipadayag ni Glen Hontiveros, usa ka Historian, atol sa pagsaulog kagahapong adlawa sa ika-496 nga anibersaryo sa pagpahigayon sa unang misa sa nasud nga dinhe matud pa nahitabo sa teritoryo sa Butuan ug dili sa kasamtangang giila nga didto sa Limasawa Island sa Leyte.
Sigon ni Hontiveros padayon gihapon sila sa pagpaningkamot nga mausab ang estorya sa Pilipinas sa hisgutanang kasaysayan sa unang misa dungan sa pagbutyag nga duna na silay igong mga basehan o ebidensiya nga dinhe sa Masao nahitabo ang unang misa.
Bisan matud pa sa kakulang sa pondo, dili muhunong ang mga historians sa pagkab-ot sa gitinguhang ilhon ang Butuan diin nahitabo ang unang misa.
Alayon niini, misaad si Butuan City Mayor Ronnievic Lagnada nga mohatag ug 2 milyones pesos ngadto sa mga historians nga maoy naningkamot sa pagkuha ug pagpakaylap sa impormasyon.
Sa kabahinan usab ni City Councilor Cherry Mae Busa, chairman sa Committee on Tourism, gibutyag niini nga bisan ug wala pa hingpit nga gi-rekognisa ang Butuan, palamboon gihapon nila Bood Promontory Eco Park sa may Barangay Pinamangkulan ning siyudad sa Butuan nga maoy nagsimbolo sa mga espanyol nga miabot sa lugar aron sa ingon maka-ing-ganyu ug dugang torista.
Gihagit usab niini si Congressman Lawrence Fortune nga ipaabot ngadto sa kongreso ang resolusyun nga gipangusgan sa mga Butuanon.
Ang maong selebrasyon gi-ablihan sa usa ka Balaang Misa sa mismong Bood Promontory Eco Park nga gipangunahan ni Fr. Joeselo Amalia.
