BUTUAN CITY – Padayun karun ang beripikasyun nga gihimu sa tag-as nga opisyales sa armadong kusog sa Pilipinas sa nakumpiskang notebook nga dunay ngalan sa mga opisyales sa gobyerno sa Surigao Del Norte, human na-ilog sa sundalo ang kampo sa New People’s Army.
Sigon ni Lt. Col. Rico Amaro, commander sa Army’s 30th Infantry Batallion, Philippine Army, sa nakalabay’ng mga semana, nailog sa tropa sa gobyerno ang gihimung kampo sa puwersa sa Guerilla Front Committee-16 sa NPA nga gipangunahan ni Ka Lucas sa bukirang parte sa Barangay Tinago, Malimono sa maong probinsiya.
Sa nasangpit nga operasyon, nakumpiska sa militar ang mga armas, IED, personal nga mga gamit lakip na ang notebook sa kumander nga dunay listahan sa mga mayor, barangay kapitan ug pribadong indibidwal nga matud pa naghatag kanila ug suportang pinansiyal apil na usab mga armas.
Giklaro ni Col. Amaro nga gisubmite na kini nila sa tag-as nga opisyal alang sa lawom nga beripikasyun. Apan dili mamahimong panganlan ang naasuy’ng mga opisyales ilabina kay walay direktang nakalatid sa nakuhang notebook kung nagsuporta ba ang mga indibidwal sa walhong grupo.
Kini bisan paman nga dunay nakalatid nga kantidad sa maong notebook, uban sa mga armas. Tingale matud pa ug demanda lang kini sa walhong grupo nga wala mahatag sa mga opisyal sa gobyerno.
Alayon niini, kampanta ang opisyal nga ila gihapong mahibal-an ang mga opisyales nga magsuporta sa kumunistang grupo pinaagi matud pa sa masa.
Apan ang maong impormasyun, wala gikumpirma ni Ka Otto, ang nagpailang tigpamaba sa Guerilla Front Committee 16 sa NPA.
