BUTUAN CITY – Nagpakita ug puwersa ang New People’s Army kon NPA atol sa ilang ika-48 nga anibersaryo kagahapong adlawa, pinaagi sa pag-rally dinhe sa sentrong bahin ning siyudad sa Butuan.
Muabot sa kapin 5 minutos ang pag-rally sa halos 50 ka indibidwal sa sentrong bahin ning siyudad. Gitaptapan ang ilang panagway sa pulang panapton ug naka-kalo samtang dala ang plakard sa ilang gibarugang prinsipyo.
Sa eksklusibong pakighinabi ning sibyahan sa nagpailang si Ka Juaquin, gibutyag niini nga ang ilang presensiya nagpamatood nga wala naluya ang puwersa sa Bagong Hukbong Bayan bisan paman sa padayong operasyon sa militar diha sa kabukiran.
Dungan usab kini sa pagpadayag sa ilang tinguha nga mabalik ang peace talk sa ingon nga makab-ot matud pa ang tiunay nga kalinaw.
Gibatikos usab niini ang bangis matud pa nga operasyon sa kasundaluhan diin naghatag ug krises sa mga hilit nga kumunidad.
Samtang gipasegarbu ang ilang padayon nga pagsagubang daw sa problema sa katawhan, pagsuporta sa mga maguuma ug mga nilupigang kabus.
