BUTUAN CITY – Gitawag ug nuissance attack ni Col. Franco Nemecio Gacal-commanding officer sa 402nd Brigade, Phillipine Army ang gihimung pagpangharass sa walhong grupo sa patrol base sa militar sa may Barangay Gacub, Carmen, Surigao Del Sur.
Sigon sa opisyal, usa ka pangbulabog lang nga gihimung pag-atake sa New People’s Army kagahapon sa alas 5:10 sa buntag atol sa ilang pagsaulog sa ika-48 nila nga anibersaryo.
Pagbutyag pa ni Col. Gacal, halos tunga sa kilometro ang gilay-on sa walhong grupo sa dihang ilang gipabuthan ang kampo sa militar. Wala nakatala kini ug bisan unsang damyos sa ilang kampo ug sa tropa.
Giklaro usab niini nga andam sa kanunay ang kasundaluhan sa ingon niini nga aktibidad sa walhong grupo.
Samtang sa pakighinabi usab kang Capt. Joe Patrick Martinez, spokerperson sa 4th Infantry Division, mas malinawon karun ang anibersaryo sa NPA diin wala kaayu’y natigayong pagpangharas ngadto sa kasundaluhan.
Pagbutyag pa ni Martinez, nagkaluya karun ang puwersa sa walhong grupo tungod sa padayong operasyon sa mga sundalo.
Gipahayag matud pa kini sa misurender nilang kaubanan nga nag-ingong, mag-sige nalang sila ug lakaw tungod sa tropa sa gobyerno.
