BUTUAN CITY – Nakig-alayon na ang kapulisan sa Tagbina, Surigao del Sur ngadto sa militar ingon man sa Special Action Force sa maong lungsod aron hatagan og seguridad ang operasyon sa mga banana companies sa ilang lungsod.
Kini human gitiro sa gitu-uhang mga rebeldeng New People’s Army kon NPA ang usa ka Cessna plane nga gikontrata sa Sumifru Corporation aron maoy muhimo og aerial spray sa ilang banana plantation.
Gibutyag ni P/Chief Insp. George Cariño – hepe sa Tagbina Municipal Police Station, gitiro sa mga rebelde ang pako sa maong abyon pasado alas-9:10 ning mi-aging buntag samtang nang-spray kini sa Sitio Grutto, Brgy. Sta. Fe.
Luwas ang piloto niining si Captain Magbanua human niya na-maneuver ang abyon.
Dugang pa sa opisyal, paagi kini aron hadlukon ang katawhan sa maong lugar og muhatag gilayon sa ilang demand sama sa revolutionary tax.
Positibo usab ang opisyal nga kabahin kini mga kalihukan sa rebeldeng grupo aron duna’y mataho nga accomplishment subay sa ilang anibersaryo karong adlawa. (Beth Ruiz)
