BUTUAN CITY – Kumpirmadong na-apil sa pagkasunog ang 1 year old na batang lalaki sa mi-ulbong dakong sunog kaganinang sayu sa udtu sa may Barangay New Society ning siyudad sa Butuan.
Nakuha na ang sunog nga patay’ng lawas ni Zion Marquita samtang ang iyang igsoong si JD, 4-anyos, padayon kining gitambalan sa pribadong ospital ning dakbayan human nakahi-agum ug pagkapaslot.
Gihulat nalang sa pagkakarun ang pormal nga kumpirmasyon sa SOCO.
Nasayrang nidalikyat lang sa paglakaw ang amahan sa mga biktimang si Balong samtang ang iyang asawang si Ligaya, tu-a usab sa trabahoan.
Pag-ulbo sa kalayu, nakuha niya ang 4-anyos nga anak apan pakyas nang naluwas ang biktimang napatay.
Sa pakighinabi kang SFO4 Rodrigo Canton, OIC Firemarshall sa Bureau of Fire Protection kon BFP-Butuan City, gibutyag niini nga nadawat nila ang tawag alas 12:57 sa sayung udtu ug nadeklarang fire-out alas 2:42 sa hapon diin miabot sa 4Th alarm ang maong sunog.
Sa karun, padayon pa ang ilang imbestigasyon sa maong insedente aron masuta ang ihap sa mga dakbalay nga na-ugdaw lakip na ang kinatibuk-ang danyos niini.
Gi-imbestigahan usab nila ang sinugdanan sa pagulbo sa kalayu.
