BUTUAN CITY – Padayon pang gipanubayan sa kapulisan sa Surigao City ang tinud-anay nga nahitabo sa usa ka Dutch national kinsa napalgan na lang nga wala na’y kinabuhi sulod sa pansayan sa iyang pinuy-anan.
Naila ang biktimang si Roy Anthony Leenderts, 55-anyos, buwag sa asawa og residente sa Purok 4 Brgy. Mabua.
Migawas sa inisyal nga imbestigasyon base sa pamahayag sa ka-uban niini sa pinuy-anan nga si Ashley, nakaplagan na lang niyang nagbuy-od na sulod sa Comfort Room sa iyang balay ang biktima hinungdan nga nagpakitabang siya sa mga silingan hangtud nga nasutang patay kini.
Dugang pa ni Ashley, sa wala pa mahitabo ang nadangatan sa biktima, nagtumar matod pa kini ug tambal nga pangpagana sa pakighilawas hinungdan nga usa kini sa sutaon nga posibleng hinungdan sa iyang nadangatan. (Beth Ruiz)
