BUTUAN CITY – Nagpa-ambit sa iyang kasaysayan ang security guard sa Bombo Radyo Butuan ug Bombo Volunteer nga mi-gradwar sa kursong BS Criminology sa sikat nga unibersidad ning dakbayan.
Sa eksklusibong pakighinabi ning sibyahan, gisaysay ni Romnick Cuyos, 25-anyos nga taga General Santos City ang kalisud sa ilang pamilya nga maoy nagtuklod kaniya apil na sa iyang duha ka mga igsoon sa pagpangeta ug pamaagi aron lang makapadayun sa pag-eskwela.
Maayo nalang matud pa kay gitabangan siya sa security agency nga iyang gi-aplayan diin giplastar siya isip pang-gabii nga guwardiya aron maka-eskwela sa buntag.
Daghan matud pa siya ug kasinatian nga makapaluya kaniya, ilabina ang problema sa pinansiyal.
Gane, dunay panahon pa nga nalubong siya sa utang ug bisan paman sa iyang pagpaso niadtong Sabado, Marso 25, aduna pa siya’y balanse nga bayronon sa eskwelahan.
Apan tungod sa iyang determinasyun, wala siya nihunong sa pagkab-ot sa iyang pangandoy diin ang 4 ka tuig nga kursong BS Criminology, natapos niya ug 6 ka tuig.
Niadtu lang Enero 2017, na-promote siya isip operation supervisor. Sa karun, nangandam na si Cuyos sa licensure examination.
Lakip usab sa plano niini ang mupadayon sa pagtungha aron mahimong abogado. Apan kung dunay mas maayong opurtunidad matud pa, dili kini niya usikan dungan sa pagsalig sa Labaw’ng Makagagahum.
Mitambag nalang kini sa tanan, ilabina sa mga susama niya ug kahimtang sa kinabuhi, nga mangeta ug pamaagi aron maka- eskwela ug dili magpabilin sa unsay nasinatian nga kalisud.
Daghan na matud pa karung mga ahensiya o mga establishemento nga modawat na ug working student.
