BUTUAN CITY – Nagpadayon ang hot pursuit operations sa mga sakop sa 26th Infantry Battalion, Philippine Army batuk sa mi-atras nga mga rebeldeng New People’s Army kon NPA human ang engkwentro nga mikalas og duha ka mga rebelde og usa ka CAFGU member.
Sigon ni Lt. Col. Rommel Pagayon sa 26th IB, pasado ala-una ning mi-aging hapon, girespondihan sa kasundaluhan ang report sa mga residente sa Sitio Mandanao, Brgy. Binucayan sa lungsod sa Loreto, Agusan del Sur kalabot sa sightings sa mga rebelde hinungdan sa 20-minutong engkwentro.
Daling misibat ang mga rebelde biniyaan ang ilang mga gamit apil na ang namatay nilang ka-ubanang nailang si Arnel Perez nga gikanaog na sa tropa sa kagamhanan aron mahatagan og desenteng lubong samtang gidala usab sa ilang lugar sa Kibawa sa lungsod sa Laak, Davao del Norte ang ilang ka-ubanang amasonang namatay usab sa engkwentro.
Gikumpirma usab sa opisyal nga namatay sa engkwentro ang CAFGU member nga si Guminang og nakarekober usab sila og duha ka mgfa armas sa encounter site.
Sa nasayran sa opisyal, ang Front Committee 34 ni Ka Tindugan ang nag-operate matud pa sa maong area kondiin gisumbong sila sa mga residente tungod sa ilang gihimong pagpangilkil. (Beth Ruiz)
