BUTUAN CITY – Usa ang patay samtang laing usa ang angol human mibangga ang usa ka pick-up type nga multicab sa Isuzu forward truck nga kargado og saging kaganinang alas-kwatro sa kaadlawon sa super highway sa Purok 2, Brgy. Bonbon ning siyudad sa Butuan.
Naila ang namatay nga si Joel Aresgado, 33-anyos, driver sa pick-up type multicab samtang angol usab ang ka-uban niining si Paulo Revillas, pulos taga-Brgy. Christine, Barobo, Surigao del Sur.
Sigon ni PO3 Babor sa Butuan City Police Station 3, pasado alas-6:32 sa buntag namatay ang driver base na sa pagdeklara sa attending physician sa gidalhan niining ospital.
Kasong reckless imprudence resulting to homicide og serious physical injuries and damage to property ang ipasaka batuk sa driver sa forward truck nga si Jorge Medivilla, taga-Brgy. Sinubong, Veruela, Agusan del Sur.
Una nang gibutyag ni Jorge Medivillo nga ang multicab matud pa ang mibangga sa ilang sakyanang padulong sa Nasipit, Agusan del Norte gikan sa Veruela bisan og gisimang pa niya ang iyang sakyanan.
Mi-overtake matud pa ang multicab sa usa ka van og tungod kay alanganin na ang ilang distansya hinungdan sa maong insidente. (Beth Ruiz)
