BUTUAN CITY – Giklaro ni P/Sr. Supt. Romualdo Bayting – provincial director sa Surigao del Sur Police Provincial Office nga wala mulampos ang mga rebeldeng NPA sa ilang pag-atake sa kapulisan sa Barobo uban sa First Maneuver Company sa Regional Public Safety Battalion kon RPSB-13 tungod sa ka-alerto nang daan sa ilang pwersa.
Sa pakighinabi ning sibyahan, gipadayag sa opisyal nga nasayod na silang daan sa pattern sa mga rebelde nga maglusad og sunod-sunod nga pagpangatake higayong magsingabot ang ilang anibersaryo hinungdan nga mas gi-alerto na nilang daan ang ilang pwersa.
Gani sa ilang level, duna na sila’y gihan-ay nga mga counter-measures aron mabatukan ang ingon niini nga plano sa mga rebelde.
Giklaro usab sa opisyal nga ang gihimo sa mga rebelde, dili makonsiderang pagpakita sa kakusog sa ilang pwersa tungod kay ang kamatu-uran nga nag-usa na ang pipila nila ka ggrupo, pamatuod lang sa nagkahuyang nilang pwersa.
Tungod sa pattern sa NPA paglusad og mga pagpangatake sa nagkaduol nilang anibersaryo, giklaro sa opisyal nga anaa sila karon sa pinakataas na level sa red alert og ang ingon niini nga report, gitutukan nila og maayo aron dili mulampos ang walhong grupo. (Beth Ruiz)
