BUTUAN CITY – Nagbansay na ang mga magtutunghang atleta ning rehiyon sa Caraga nga murepresentar sa Department of Education kon DepEd-Caraga alang sa 2017 Palarong Pambansa.
Gibutyag ni Elizalde Bernales – information officer sa maong buhatan, nagsugod ang pagbansay sa mga atleta niadtong Lunes og mulungtad sa Abril 13 – duha ka adlaw adiser ang pagbiya na sa mga delegado padulong sa San Jose de Buenavista City sa lalawigan sa Antique.
Dugang pa ni Bernalez, gikatag ang training venues sa mga atleta kondiin duna’y magbansay dinhi sa Butuan alang sa arnis, badminton, baseball, billiards, sa Dinagat Island province usab alang sa archery, samtang sa Nasipit, Agusan del Norte ang athletics sama sa track and field, javelin throw, high jump og uban pa.
Didto usab sa Bislig City sa Surigao del Sur ang training sa basketball, sepak takraw, sa Tandag City usab sa susamang lalawigan ang chess og futsal nga himuon sa lungsod sa Lianga sa susamang lalawigan samtang sa Agusan del Sur ang boxing, football og uban pa.
Magpadala og 751 ka delegasyon ang DePEd-Caraga kondiin ang 620 niini, gilangkuban sa mga atleta, coaches, assistant coaches og mga chaperons samtang 131 gilangkuban usab sa mga delegating officials sama sa mga honorary officials.
Samtang aron matudluan og maayo ang mga atleta kalabot sa mga pinaka-ulahing scientific methods sa mga teknik, nag-hire usab sila og mga trainers gikan sa kauluhang Manila.
Ang maong mga trainers maoy mubansay sa mga individual athletes aron makuha ang ilang target nga maksakmit man lang og 12 ka mga medalyang bulawan o kaha ikadose nga pwesto sa national ranking. (Beth Ruiz)
