BUTUAN CITY – Wala’y natalang casualty sa panig sa mga pulis sa Barobo, Surigao del Sur human ang tunga sa oras nga engkwentro tali sa mga rebeldeng New People’s Army kon NPA nga natigayon sa Purok 1, Brgy. Tambis sa ilang lungsod kagahapon sa hapon.
Sigon ni P/Chief Insp. Manolo Andrew Caoile – hepe sa Barobo Municipal Police Station, nakadawat sila og intelligence report kagahapon sa ala-una sa hapon kalabot sa na-monitor nga dili muminos sa 20 ka mga armadong lalaki nga gitu-uhang nga rebeldeng NPA sa may Purok 1 og sa Sitio Lansang Creek sa Brgy. Tambis ingon man sa Sitio Kampo Langit sa Brgy. Sudlon sa ilang lungsod nga nagplanong magsabwag matud pa og kagubot.
Tungod niini, iya gilayong gi-organisa ang usa ka grupong gilangkuban sa pipila niya ka mga personahe og sa First Maneuver Company sa Regional Public Safety Battalion kon RPSB-13 alang sa ilang ilusad nga clearing operations. Pagka-ala-1:30 sa hapon, ila gilayong gi-adtuan ang Purok 1, Brgy. Tambis sakay sa duha ka mga PNP vehicles diin nakita nila ang gitu-uhang mga rebelde nga nanago sa kasagbutan dapit sa national highway.
Dinhi na mi-ambak gikan sa ilang gisakyan ang mga pulis nga natayming sa mibusikad nga improvised explosive device kon IED nga gisundan na sa pagpaka-paka sa armas hinungdan sa tunga sa oras nga natigayong engkwentro. Naka-angkon lang og damyos ang patrol car sa RPSB-13 tungod sa impact sa mibusikad nga IED.
Base sa report nga ilang nakuha, ang ilang na-engkwentrong tropa gikan sa Guerilla Front Committee 19-A kansa ila pang kumpirmahon subay sa padayon nilang imbestigasyon.
Ilang narekober sa encounter site ang mga gasolinang gisulod og containers, mga war devices og back packs. (Beth Ruiz)
