BUTUAN CITY – Gitin-aw karon sa kapulisan sa syudad sa Cabadbaran nga tulo lamang ug dili upat ang natalang patay sa nahitabong pagpamusil ning nakalabay’ng gabie didto sa Purok 1, Brgy. 3, Poblacion, Cabadbaran City, lalawigan sa Agusan del Norte.
Sa pakighinabi ning sibyahan, gibutyag ni PO2 Glenn Villania sa Cabadbaran City Police Station, nga sukwahi sa naunang migawas nga taho, wala matud pa nalakip sa mga namatay si Ricky Carreras, 33-anyos, taga- Brgy. 3 Poblacion, Cabadbaran City.
Gani sa karon, gi-operahan na matud pa kini sa usa ka tambalanan ning syudad ug anaa na sa stable nga kahimtang. Subay niini, giklaro sa maong police officer nga ang namatay sa insidente mao lamang sila Lotter Ladria , tag-iya sa videokehan, Jade Tagaro, 25-anyos, ug Lee Bryan Pagal, 27-anyos, residente sa Brgy. Tolosa sakop sa maong syudad.
Samtang ang angol nga nadala sa tambalanan mao sila Jarrey Abasolo ug Ricky Carreras.
Sa kasamtangan, padayon pa ang imbestigasyon sa kapulisan sa maong syudad subay sa nasangpit nga panghitabo.
Usa sa gilantaw nila nga anggulo mao ang kalambigitan sa drugas ug ang suya-suya hilabi na nga mga basketball player matud pa ang mga biktima.
