BUTUAN CIT Y – Padayon ang hugot nga imbestigasyon sa kapulisan sa Santiago, Agusan del Norte aron ma-ilhan og masikop ang riding-in-tandem nga mipusil-patay sa usa ka pulis pasado alas-nueve kagabii.
Naila ang biktimang si PO3 Jimson Morgado, 35-anyos, minyo, residente sa Brgy. Poblacion 2, lungsod sa Santiago og nadestino sa Las Nieves sa susamang lalawigan.
Sigon ni P/Insp. Tito Girado – officer-in-charge sa Santiago Municipal Police Station, mipalit matud pa og sigarilyo sa tindahan sa biktima ang wala mailang responsable og dihang gitunol na kini, dinhi na siya gipusil sa nagkada-iyang parte sa lawas hinungdan sa iyang hinanaling kamatayon.
Daling misakay ang suspek sa getaway motorcycle padulong sa wala matinong direksyon.
Narekober sa crime scene ang lima ka cartridge sa kalibre .45 nga pistola, usa ka slug og tulo ka buhing bala sa susamang armas. (Beth Ruiz)
