BUTUAN CITY – Padayon karung gikumpirma sa otoridad ang nadawat nga impormasyong dunay napatay sa panig sa rebelding grupo human naka-engkuwentro sa niaging alas 11:00 sa buntag sa may Brgy. Sta. Cruz, Rosario Agusan del Sur.
Sigon ni P/Sr. Supt Joseph Plaza, provincial director sa police provincial office sa Agusan del sur, dunay sibilyang nakakita sa misibat nga rebelding grupo nga dunay bitbit nga patay’ng lawas sa ilang kaubanan.
Nasayrang ang 30 minutos nga sinukliay ug bala miresulta sa pagka-ilog sa dakong kampo sa New People’s Army kon NPA. Narekober usab sa clearing operation sa Provincial Public Safety Company kon PPSC ug 26th IB Phil. Army, ang mga bala sa M16 ug AK47 nga armas, wire ug ubang gamit sa paghimu ug improvised explosive device (IED), unipormi sa mga NPA, personal nga mga gamit ug mga subersibong dokumento.
Ang maong kampo matud pa daw sama kadako sa 10 ka basketball court.
Gipadayag pa sa opisyal nga kanunay silang andam sa paghatag ug suporta sa kasundaluhan diha sa pagmintina sa kalinaw sa lugar.
