BUTUAN CITY – Gipakisayran na sa kapulisan sa Talacogon, Agusan del Sur ang hinungdan sa pagmaoy sa usa ka ulitawo sulod sa school campus nga misangpot sa pagpusil-patay kaniya sa miresponding pulis.
Namatay gilayon ang 21-anyos nga si Neil John Denaraga Cuyo, residente sa Purok Sampaguita, Brgy. San Agustin sa maong lalawigan human gipusil ni SPO1 Bentuso.
Sigon ni PO3 Glenn Mondejar, nagpatabang kanila ang mga opisyal sa maong barangay kagahapon tungod sa pagmaoy sa suspek sulod sa compound sa Talacogon Central Elementary School sa Brgy. San Isidro nga duna pa’y dalang hatsa hinungdan sa pag-panic sa tanan.
Sigon ni Mondejar, imbes nga musunod sa ilang hangyo nga mukalma og musurender, gigukod pa hinuon sila hinungdan nga napugos si SPO1 Bentuso pagpusil kaniya resulta sa iyang pagkamatay.
Nasayrang anaa sa drug’s watch list ang suspek apan wala kini mitahan sa unang gipatumang Oplan Tokhang. (Beth Ruiz)
