BUTUAN CITY – Inisyal nang nahatagan og hinabang sa lokal nga kagamhanan sa Butuan City ang mga pamilyang biktima sa sunog pasado alas-sais kagabii sa Purok 4, Brgy. Holy Redeemer.
Sigon ni Brgy. Captain Efren Acaso, naghatag na kagabii ang mga personahe sa City Social Welfare and Development (CSWD) og banig, moskitero, habol, mga kitchen utensils og mga food packs aron magamit sa mga biktima.
Aminado ang kapitan nga daghan sa iyang mga constituents ang wala’y nabitbit gikan sa nasunog nilang kabalayan tungod sa kapaspas sa hitabo nga dala na usab sa mga balay nga gama kadaghanan sa light materials.
Nagpasalamat usab ang kapitan nga wala’y namatay o kaha na-angol sa maong sunog.
Sa inisyal nga assessment, gibana-banang anaa sa kapin usa ka milyon ka pesos ang danyos sa sunog nga gideklarang anaa sa 3rd alarm og nakontrola pasado alas-7:45 na kagabii. (Beth Ruiz)
