BUTUAN CITY – Nag-panic matud pa pag-ayo ang mga residente sa Brgy. Hinimbangan, lungsod sa Kitcharao, Agusan del Norte human ang sunod-sunod nga sinukliay ug bala sa mga sakop sa rebeldeng NPA ug mga sakop sa 29th IB, PA.
Sa pakighinabi ning sibyahan, gibutyag sa usa ka wala magpailang impormante nga sukad niadtong adlaw’ng Lunes sa gabie, sunod-sunod ang gihimong harassment sa mga sakop sa walhong grupo ngadto sa mga kasundaluhan kungdiin ang nakapasamot pa sa kahadlok sa mga sibilyan ang panag-engkwentro nga diha pa mismo mahitabo sa ilang barangay hall.
Kanunay usab matud pa ang pagpang-snipe sa mga rebelde ngadto sa mga sundalo maoy hinungdan nga kanunay gyud nga adunay tensyon.
Tungod niini, nakadesider na lamang ang mga residente sa pagbakwit ngadto sa pinakaduol nga eskwelahan sa ilang lugar aron nga aduna sila’y matagoan.
Samtang gikumpirma usab ni 2nd Lt. Ashley Del Rosario sa 29th IB, PA ang sunod-sunod nga harassment nga gihimo sa walhong grupo ngadto sa ilang mga sakop.
Gipasabot niini nga igo lang matud pa nagpahigayon ug peace and development effort ang ilang mga sakop sa maong barangay kangsa ginababagan sa rebeldeng grupo.
Apan bisan paman niini, wala hinuon matud pa’y naitala nga casualty sa ilang han-ay. (Rolan Janea)
