BUTUAN CITY – Gipalawman pa ang imbestigasyun sa kapulisan sa laing pagpamusil alas 9:20 kagabii sa may Purok-3 Bingkilan, Barangay San Vicente ning siyudad sa Butuan diin 2 ang patay, 1 ang kritikal ug laing 3 ang samaron.
Sigon ni Pulis Insp. Augustus Navarro, hepe sa Butuan City Police Station-1, ila pang gikuha ang tanang impormasyon aron masuta ang motibo ug responsable sa pagpamusil sa mga trabahante sa usa ka saw mill sa maong dapit.
Naila ang Dead on arrival nga biktima nga si Lemuel Amao Batoon, 21-anyos nga taga p-1, Bading ning dakbayan diin na-igo sa walang dughan ug sa tuong kamot samtang nakabsan usab sa hinulamang kinabuhi si Patchez Sumile Lanugan, 29-anyos dunay kapuyo nga taga Sta. Ana, Tubay, Agusan Del Norte diin naigo sa tuong bahin sa dughan, hita ug bukton, samtang nagpabilin sa balay tambalanan sa Butuan Medical Center si Albert Lutay Pahelangco, 22-anyos nga taga P-3, Barangay 9, Buenavista, Agusan del Norte nga na-igo sa likod ug nilapos sa tiyan.
Nakagawas na usab sa ospital sila Virgil Salisina Morata, 31-anyos nga na-igo sa tiil ug kamot, Fren ian Lou Calo, 29-anyos kansa na-igo sa walang kamot ug Bernabe Durango 30-anyos nga na-igo sa tiil ug parehong mga residente sa P-1, Bingkilan, San Vicente.
Pagbutyag pa sa Hepe, nagkasabot matud pa ang mga biktima nga mag-inom ug ilimnong makahubog sa usa ka tindahan sa maong dapit, apan pipila pa lang ka minuto sa ilang drinking session, kalit nga miabot ang usa ka lalaki ug namusil ngadto kanila.
Lakip karun nga gisusi sa opisyal ang rekord sa mga biktima kung na-apil ba kini sa ilang drugs watchlist.
Narekober usab sa crime ang scene ang mga basyo sa bala sa 45 nga pistola.
