BUTUAN CITY – Nagpagawas na og heavy rainfall warning ang PAGASA-Hinatuan sa lalawigan sa Surigao del Sur alang sa pipila ka mga lugar sa Mindanao tungod sa tail end of a cold front nga maoy hinungdan sa pipila ka adlaw nang pag-ulan ning pulo sa Mindanao.
Sigon ni Jill Caligsa, gi-isa na nila ang orange warning sa Misamis Occidental Zamboanga del Norte og Sur, North Cotabato, Davao del Sur og sa Surigao del Sur. Gipasabot sa opisyal nga sa orange warning, alarming na ang pagbaha tungod kay ubanan na kini og landslides.
Samtang gi-isa na usab sa ilang ahensya ang yellow warning sa Zamboanga City, Zamboanga Sibugay, Zamboanga del Sur og Norte, Misamis Oriental, Bukidnon, Camiguin, Lanao del Norte, Agusan del Norte og Sur, Surigao del Norte og Dinagat Island province apil na ang Siargao Island, Davao Oriental, Sarangani, Sultan Kudarat, Maguindanao, Cotabato City, Basilan, South Cotabato og Lanao del Sur.
Sa yellow warning matud pa, anaa na ang pagbaha sa mga lugar nga duol sa kasubaan og posibleng landslides sa kabukirang bahin.
Alayon niini, gipadayag sa opisyal nga la-uman pa ang duha ngadto sa tulo ka oras nga pagbundak sa ulan sa mga lungsod sa Santiago, RTR, Tubay Magallanes og Cabadbaran City sa lalawigan sa Agusan del Norte og sa Davao del Norte.
Gitambagan na usab niini ang mga mananagat nga dili na magpalawod tungod kay sa pagbundak sa ulan, kaluha na niini ang pagdagko sa mga balud na mu-abot sa usa ngadto sa 4-metros ang gitas-on. (Beth Ruiz)
