BUTUAN CITY – Giklaro ni New Society Village, Butuan City Brgy. Captain Marco Imam nga milayas siya atol sa drug raid nga gipahigayon sa mga sakop sa Philippine Drug Enforcement Agency kon PDEA-Caraga sa iyang pinuy-anan, tungod sa pagtanom matud pa og shabu sulod sa ilang kwarto.
Sa eksklusibong pakighinabi ning sibyahan, gibutyag ni Kapitan Imam nga dili niya madawat nga tamnan og shabu ang iyang panimalay tungod kay wala matud pa siya sukad malambigit sa operasyon og bisan na sa paggamit og ginadiling druga.
Nadismaya ang opisyal tungod kay nakig-alayon pa siya kang PDEA-Caraga Regional Director Gilbert Buenafe dihang nasayran nga anaa na sa iyang panimalay ang raiding team taliwa nga wala ang iyang presensya.
Mihangyo matud pa siya kang Buenafe nga bantayan ang mga sakop niini aron masegurong dili matamnan og shabu ang iyang panimalay kondiin bali ang nahitabo.
Misamot matud pa kalig-on ang iyang pagtuo dihang usa sa mga sakop sa raiding team ang nagtugot kaniyang makagawas sa iyang panimalay human nga nasaksihan mismo niini ang pagbutang og shabu diha sa bag sa iyang asawa kansa wala matud pa’y labot sa ilang sabot.
Gidugang pa sa kapitan nga nalipay gani siya sa sinugdanan nga gihimo ang operasyon aron usab malimpyuhan ang iyang pangalan gikan sa alegasyon anaa siya sa drugs watchlist sa maong ahensya. Apan dismayado siya sa nahitabo. (Beth Ruiz)
