BUTUAN CITY – Gihatagan ni Mayor Ike Pimentel sa Tandag City sakop sa Surigao Del Sur ug reward ang mananagat nga nakakaplag sa usa ka plastic drum nga puno sa pina-ugang marijuana sa kadagatang sakop sa Barangay Buenavista sa maong lungsod.
Sigon ni Mayor Pimentel, kaaway gyud nila ang bisan unsang klase sa illegal nga drugas, hinungdang hugot ang ilang kampanya batuk niini nga maoy rason usab sa ilang reward sa bisan kinsang makahatag kaniya ug impormasyon.
Gihatagan matud pa niya ug 5-mil pesos ang mananagat nga nagpahibalo kaniya mahitungod sa nakaplagang plastic drum nga gitoohang gi-abandona.
Daw highgrade matud pa ang maong marijuana nga gitoohang gikan sa gawas sa nasud ug gibana-banang nagkantidad sa 1.4 milyones pesos.
Giputos matud pa kini ug cellophane nga dili gyud masudlan ug tubig. Dako ang pagtoo usab ni Mayor Ike nga daghan pang mga illegal nga drugas sa kadagatan nga gi-abandona tungod sa kahadlok sa hugot nga seguridad.
Sama nalang matud pa sa balitang dunay mananagat nga nakakita ug plastic drum nga dunay sulod nga harina apan lain ang lasa hinungdang ila kining gibobo sa dagat kay basin kini makahilo. Pagduda pa sa mayor nga cocaine ang ilang nakaplagan.
Alayon niini, gi-awhag sa opisyal ang tanang mangingisda nga dal-on gelayon sa iya ugaling dunay makitang susamang butang. (Rolan Janea)
