BUTUAN CITY – Gidetine sa mga sakop sa Philippine Drug Enforcement Agency kon PDEA-Caraga ang barangay kagawad nga gikuha nilang witness sa anti-drug operations sa balay sa kapitan sa Brgy. New Society Village ning siyudad.
Kini human mihimo og eksena si Kagawad Aubrey Cedeña hinundan sa pagsibat ni Kapitan Marco Imam atol sa ilang raid kagahapon kondiin duna’y nakuhang tulo ka dagkong sachets sa suspected shabu sa bag sa asawa sa kapitan.
Nasayrang wala mupirma sa consolidation report sa PDEA si Cedeña human niini gibarugang nakita niyang usa sa mga miyembro sa raiding team ang iyang nakitang duna’y gibutang sa bag sa asawa sa kapitan diin nakuha ang suspected shabu.
Sigon sa ahensya, obstruction of justice matud pa ang gihimo ni Kagawad Cedeña.
Una nang gipamugos ni Cedeña nga wala’y nakuha ang raiding team niadtong una nilang gisulod ang kwarto diin nakuha ang suspected shabu gawas nga wala usab kini masimhuti sa ilang K-9 dog hinungdan nga nagtuo siyang planted ang nakuhang druga.
Mahinumdumang kalit lang nawala si Kapitan Imam atol sa operasyon og padayon pang gipangita. (Beth Ruiz)
