BUTUAN CITY – Shock ug wala kasabot sa gibati ang panganay nga anak sa drayber sa tourist bus nga na-aksidente sa Tanay, Rizal sa niaging adlaw diin mipatay sa 15 ka mga kinabuhi ug daghan ang angol.
Kini ang gibutyag sa pakighinabi ning sibyahan kang Janlyn Lacorda, 18-anyos nga taga- Purok Rosal, Mainit, Surigao Del Norte ug panganay nga anak sa namatay nga drayber sa bus nga si Julian Lacorda Jr. 38-anyos.
Saysay pa ni Janlyn, dugay rang nagbulag ang iyang ginikanan diin 4 sila ka magsoon nga gibiyaan sa iyang amahan tungod sa babae.
Kini ang rason nga nahilayu na ang iyang pagbati ngadto sa iyang amahan nga miadtu sa Manila ug naka-trabaho isip drayber. Bisan paman niini, shock gihapon siya ug nag-gool sa nahitabo sa iyang amahan nga lakip sa namatay sa aksidente.
Atua na ang iyang inahan sa Novaliches, Quezon City aron maghikay ug makuha ang patay’ng lawas sa iyang amahan ug madala sa Mainit, Surigao Del Norte.
Gilaumang muabot matud pa sa maong lugar ang patay ‘ng lawas sa biktima ugmang adlawa.
