BUTUAN CITY – Muabot sa dul-an usa ka libo ka mga indibidwal ang nagpahigayon ug lihok-protesta atubangan sa buhatan sa Department of Environment and Natural Resources ( DENR ) – Caraga.
Sa pakighinabi ning sibyahan, gibutyag ni Alfred Toledo, usa sa mga nagprotesta, nga nag-unang katuyuan sa ilang gihimo nga rally mao ang pagpaabot sa ilang mga yangongo ngadto na sa maong buhatan hilabi na kay DENR Sec. Gina Lopez mahitungod sa ilang hugot nga pagsupak sa una nang gipagawas niining kamandoan sa pagpasira sa pipila ka mga minahan ning rehiyon.
Sigon niini nga muabot matud pa sa 16-mil ka mga trabahante sa mina ang mawad-an ug trabaho ug tungod niini mabutang matud pa sa kaalaotan ang ilang pamilya.
Samtang sa kabahinan sa DENR-Caraga, gibutyag ni Dir. Charlie Fabre, ang bag-ong natudlo nga regional director sa nasangpit nga buhatan, nga iya matud pang ipaabot gilayon ngadto sa opisina ni Sec. Lopez ang gihimong pagprotesta sa maong pro-mining group hilabi na ang mga gipasibaw nga mga yangongo sa mga niini.
Nagpasalamat usab kini ngadto sa maong mga nagprotesta tungod kay pinaagi sa ilang gihimo, mas dali nilang nasayran ang tinud-anay nga sentimento sa mga maapektuhan sa nasangpit nga pagpasira sa mga minahan.
