BUTUAN CITY – Padayon pang gikompirma kung food poisionong ba gyud ang hinungdan sa pagdala ngadto sa ospital sa 50 ka mga delegado nga partisipante sa ika 20th Caraga Regional Athletic Meet kon CRAM sa Tandag City.
Sa pakighinabi ning sibyahan kang Elizalde Bernalez, ang Public Information Officer sa DepED-Caraga, nakasinati matud pa ug pagsuka-suka ug hilanat ang mga partisipante nga gilangkuban sa mga atleta ug coaches gikan sa Bayugan City Chapter nga kansa gidala gilayon sa provincial hospital sa Tandag alang sa medikal nga atensyon.
Posible matud pa nga gumikan kini sa frozen nga mga pagkaon sama sa manok nga kansa gikan pa kini sa ilang lungsod ug gikaon pag-abot sa ilang mga billeting quarters.
Dugang pa sa opisyal nga nakagawas na sa ospital ang uban pa nga mga atleta ug kagahapon duna na lamay 9 ka mga nahibiling pasyente nga gilangkuban sa 7 ka atleta ug 2 ka mga coaches apan pag-abot sa hapon kagahapon, nakagawas na ang lima ug nagpabilin pa ang duruha ka mga coaches.
Gitin-aw sa opisyal nga walay angay kabalak-an ang mga ginikanan sa mga delegado gumikan kay igo lamang kini sila papahulayon ug posibleng makabalik na sa dula.
Samtang giklaro sa opisyal nga walay angay kabalak-an ang mga ginikanan sa mga atleta gumikan kay ang lokal nga panggamhanan na sa lugar ang mubayad sa mga balayrunon sa ospital.
