BUTUAN CITY – Misamot pa ang gibating kahadlok sa mga biktima sa 6.7 magnitude nga linog sa Surigao City tungod sa sunod-sunod nga kusog nga aftershocks.
Bandang 7:14 kagabi-i mitay-og ang aftershock nga dunay kusog nga 3.9 magnitude, ug sa pag-abot sa 1:37 sa kaadlawon kaganina, nabati usab ang 3.0 magnitude nga maoy hinungdan sa halapad nga power outage apan nabalik usab ang suplay sa kuryente alas 2:00 sa kaadlawon.
Pag-abot usab sa alas 3:14 kaganinang buntag subling mitay-og ang kusog nga aftershocks nga dunay 3.7 magnitude, nga gisundan usab sa 4.9 magnitude sa pagabot sa usa ka oras.
Tungod niini, naputos sa kahadlok ang mga residente nga nakapasamot sa gibating trauma.
Samtang hangtud karung adlawa, nagpabiling suspendido ang klase sa tibook siyudad.
