BUTUAN CITY – Hilabihan ang kasubo karun sa usa ka Pinay nga nagpuyo na sa Amerika tungod kay ang gipatukod niyang panimalay alang sa iyang amahan, mao naman hinooy mikutlo sa kinabuhi niini.
Nasayrang miadtung mitay-og ang 6.7 magnitude nga linog, natulog lang ang 86-anyos nga si Lorenzo Dequino nga taga Barangay Poktoy, siyudad sa Surigao, sa dihang nahugno ang panimalay niini, bandang alas 3:00 sa kaadlawon nalang kining nakit-an sa mga rescuer nga wala nay kinabuhi.
Nasayran usab nga ang biktima, usa na matud pa ka American Citizen apan mipauli kini sa Surigao tungod kay dili na maka-agwanta sa katugnaw sa maong nasud.
Sigon sa anak niining si Cheryl Johnson, gipabuhatan kini ug panimalay nga nahuman lang sa niaging tuig ug nabendisyunan niadtong Disyembre.
Sa pagkakarun, gikatakdang mooli ang anak sa dakbayan aron mosud-ong sa katapusang higayon sa iyang amahan.
Bisan paman niini, mapasalamaton gihapon ang mga kabanay sa biktima tungod sa pagbisita ni Pangulong Rodrigo Duterte bisan paman sa daot nga panahon.
