BUTUAN CITY – Gikumpirma ni PO2 Marlie Taledro sa Santiago Municipal Police Station nga dunay 1 ka sundalo nga casualty samtang laing 2 usab sa sibilyan human kini girapido sa gitoohang rebelding New People’s Army kagahapon sa buntag sa may Sitio Sarog, Barangay San Isidro lungsod sa Santiago, Agusan Del Norte.
Naila ang mga biktima nga sila Sgt. Marlon Balaes, squad lider, ug sibilyang sila Pepito Tiambong, 33-anyos, menyu nga taga P-7 ug Jerson Saladara Veto, 19-anyos, olitawo ug nanimuyo sa P-5 nga parehong sakop sa maong barangay. Nakig-estorya lang matud pa ang sundalo sa mga sibilyang nagpahigayon ug small scale mining sa dihang girapido sa armadong grupo.
Sa pakighinabi usab ning sibyahan kang Capt. Angelo Gomez, tigpamaba sa 29 Th Infantry Battalion, Philippine Army, gibutyag niini nga grupo ni Alyas Utob sa guerilla front committee front 16-A sa NPA.
Samaran usab sa maong pagpamusil ang laing 3 pa ka mga sibilyan. Nanghinaot nalang si Capt. Gomez nga tumanon sa mga rebelde ang gideklarang local ceasefire sa Surigao City aron mahunong na ang ilang pagsabwag ug kagubot.
