BUTUAN CITY – Gikasubo ni Cabadbaran City Councilor Salutario Cuasito ang pag-dis-apruba sa sugyot nga Annual Investment Plan kon AIP sa maong siyudad.
Sumala pa ni konsehal Cuasito, namantsahan sa politika ang maong balaodnon tungod kay hugot nilang gibabagan ang proyektong ospital sa kasamtangang administrasyon.
Dili matud pa niini masabtan kung nganung ila kining gi-dis-apruba nga unta alang man sa mga Cabadbaron ang mga proyekong nakalatid niini.
Ugaling dili matud pa kini hingpit nga mapapasar, posibling masayang lang ang 300 milyones pesos nga pondo gikan sa Department of Budget and Management kon DBM tungod kay wala may proyektong dapatan niini.
Gipasabot pa niini nga ma-disapproved lang ang AIP ugaling dunay makitang illegal o kaha bayolasyon. Lakip sa gi-kuwestiyon ni Cuasito ang pag-apil sa presiding office sa sesyon, sa nahitabong botasyon sa maong sugyot nga nakapatabla.
Alayon niini, nagsulat matud pa sila ug pagpasabot ngadto sa nasyunal nga opisina sa DILG apan gi-refer sila sa regional office, nga wala usab direktang mitubag sa ilang pangutanan.
Plano nila karun nga imbitahon ang DILG-Caraga sa ilang regular session aron mapasabot niini ang ilang mga pangutana.
