BUTUAN CITY – Padayon karun ang imbestigasyun sa Butuan City Police Station 4 mahitungod sa pagpamusil-patay kagabii bandang alas 7:40 sa may Purok-1, Taguibo, ning siyudad sa Butuan.
Naila ang biktima nga si Edmer Gemao Tumampos, 45-anyos, meny, usa ka laborer nga residente sa maong dapit.
Sa impormasyong nakuha ning sibyahan, matulog na unta ang biktima kauban ang iyang asawang si Irene Tumampos, sa dihang dunay namatikdang tawo ang iyang bana hinungdang iya kining gigawas.
Duna matud pay 2 ka wala mailang tawo nga ni-estorya sa iyang bana dayung pusil sa makatulo ka higayon.
Igo sa nagkadaiyang parte sa lawas ang nahi-agum sa biktima nga daling gidala sa Butuan City Medical Center apan gideklara kining dead-on-arrival sa attending physician.
Daling misibat usab ang mga suspek nga kasamtangan pa karung gipangeta.
