BUTUAN CITY – Human ang sunod-sunod nga pagpusil sa mga government lawyers sa Surigao City, mi-withdraw na sa ilang representasyon gikan sa tanang drug cases ang mga abogado, judges og mga prosecutor-members sa Integrated Bar of the Philippines kon IBP-Surigao del Norte.
Sa ilang gipagawas nga sulat-pamahayag nga gipirmahan ni IBP-Surigao del Norte President Noel Pangilinan, hini-usa nilang gibutyag nga kini isip pagpakita sa ilang protesta sa sayop nga pagsabot sa legal process nga misangpot sa pag-akusa sa ilang mga ka-ubanan nga mga drug coddlers og mga protector matud pa, ilabina niadtong mga kasong na-dismiss sa ilang sala.
Sa pakighinabi ning sibyahan, gibutyag ni Pangilinan nga pabilin nilang i-withdraw ang ilang representasyon sa maong mga kaso hangtud nga madakpan og mahukman na ang mga mipusil sa duha na nila ka mga ka-ubanan.
Mahinumdumang niadtong Pebrero 2, gipusil-patay sa riding in tandem suspects si retired RTC Judge Victor Canoy nga gisundan gilayon sa pagpusil kang Surigao City prosecutor Manuel Tesiorna paglabay sa upat lang ka mga adlaw.
Dili matud pa nila ibutang sa peligro ang ilang kinabuhi og ang kinabuhi sa ilang pamilya kung ingon lang niani kagaan ang ilang seguridad. Tumong niini nga madunggan sa mga tag-as nga opisyal ang ilang gamay nga tingog sa ingon mahatagan og tukmang aksyon.
Hugot usab nilang gikondena ang maong sunod-sunod nga pagpamusil sa ilang ka-ubanan.
Kini usab ang hinungdan sa ilusad nilang motorkada og rally ugmang adlawa, Huwebes nga sugdan sa alas-nueve sa buntag gikan sa IBP Building sa Brgy. Parola nga tapuson usab sa Surigao City Luneta Park pinaagi sa usa ka programa. (Beth Ruiz)
