BUTUAN CITY – Gipalawman sa kapulisan sa siyudad sa Surigao ang ilang imbestigasyun sa laing pagpamusil na usab sa mga fiscal sa ilang siyudad kaganinang alas 7:00 sa buntag sa may Barangay Canlanipa.
Sa pagkumpirma ni P/Sr. Insp. Tessie Moleta, tigpamaba sa Surigao City Police Station, kritikal karun ang kondisyun ni Surigao City Prosecutor Manuel Tesiorna Jr., human kini gipusil sa riding-in-tandem.
Sumala pa sa opisyal, wala pa kagawas sa gate sa iyang panimalay ang biktima sa dihang gidool kini sa suspetsado nga nagkalo ug nakatap-tap ang nawong dayung pusil nga mi-igo sa dughan ug li-og sa biktima.
Daling misibat usab ang suspetsado kauban na ang nagsilbing look-out niini nga kaubanan sakay sa single motor.
Sa kasamtangan, padayon pang gisuta ang motibo sa maong pagpamusil.
Una nang gipusil-patay ang kanhe judge nga si Victor Canoy sa niaging mga adlaw nga nahitabo sa Barangay Washington sa maong siyudad.
Alayon niini, gipahugtan usab sa kapulisan ang pagpatuman sa heightened alert status dungan sa pagmontar sa mga checkpoints ug presensiya sa kapulisan.
Samtang gihagit usab niini ang tanang katawhan nga itaho gelayon sa ilang buhatan ugaling dunay mamatikdang kadudahang tawo.
