BUTUAN CITY – Padayon pa ang imbestigasyon sa kapulisan sa Surigao City sa pagpusil-patay sa kanhi judge sa Branch 29, RTC 10 Regional Trial Court kaganina nga si Victor Canoy sa Brgy. Washington.
Sigon ni P/Sr. Insp. Tessie Moleta – information officer Surigao City Police Office, nagpalit matud pa og sud-an ang kanhi huwis pasado alas-11:35 kaganinang buntag sa usa ka karenderya dihang giduol kini sa suspek sa iyang likod dayong pusil sa iyang ulo og misibat sakay sa nakatambay na daang motorsiklo nga duna na’y naghulat nga driver.
Dali pa kining gidala sa Caraga Regional Hospital apan gideklarang dead on arrival sa attending physician.
Timing matud pa nga duna’y naka-detail nga police beat patroller sa crime scene hinungdan nga napusilan pa ang suspek kinsa na-igo sa likod apan padayong misibat palayo sa dapit nga nahitabuan.
Suot matud pa sa mga suspek ang kolor itom nga kalo og naka-sun glasses ingon man face mask pa, hinungdan nga lisod ma-ilhan sa mga nakasaksi.
Padayon ang manhunt operation sa kapulisan og nag-deploy na usab sila og mga sakop sa mga exit areas aron masegurong dili makagawas sa maong siyudad ang mga responsable.
Kini gawas pa sa ilang pakig-alayon sa mga ospital ingon man sa mga kasikbit nga municipal police stations og mga municipal hospitals alang sa ilang pagkasikop. (Beth Ruiz)
