BUTUAN CITY – Wala’y hunong ang monitoring sa Quick Response Team sa Department of Social Welfare and Development kon DSWD-Caraga sa sitwasyon sa tibuok rehiyon human gi-igo sa sunod-sunod nga daut nga panahon.
Gibutyag ni Eunice Montaus-Plaza, information officer sa maong buhatan, sa pinaka-ulahi nilang monitoring, pabiling apektado sa pagbaha ang upat ka mga lalawigan, 28 ka mga munisipyo, ang dakbayan sa Butuan og 128 ka mga barangay nga naka-apekto na sa 44-mil, 880 ka mga pamilya kon 162-mil, 594 ka mga indibidwal.
Sa kasamtangan, misaka na sa 208 ka mga evacuation centers ang gibuksan sa tibuok rehiyon nga gi-ukupahan karon sa 14-mil, 496 ka mga pamilya kon 63-mil, 878 ka mga indibidwal.
Giklaro pa sa opisyal nga gawas sa hinabang nga ila nang natunol ngadto sa mga biktima sa mi-aging gilusad nga tail end of a cold front, laing hugna usab sa augmentation assistance ang ilang natunol nga mubalor ngadto sa 2-milyunes, 485-mil, 510-pesos subay sa pagtunhay sa low pressure area.
Ang maong kantidad maoy gigamit sa pagpalit og mga family food packs og mga non-food items.
Kini wala pa’y labot sa kantidad sa hinabang ga gitunol sa mga local government units nga mi-abot sa kapin 3-milyunes pesos. (Beth Ruiz)
