BUTUAN CITY – Gi-rekomenda sa City Disaster Risk Reduction and management council kon CDRRMC-Butuan ang pagdeklara ug state of calamity sa dakbayan tungod sa halapad nga pagbaha.
Kini human sa natigayong emergency meeting kagahapong adlawa. Sigon ni Paolo Gogo, Public Information Officer sa Butuan City Government, nahimong basehan sa nasangpit nga rekomendasyon ang dakong damyos nga nahatag sa halapad nga pagbaha nga dala sa sunod-sunod nga daot sa panahon.
Miabot na matud pa sa 30 ka mga barangay ang hilabihang na-apektuhan sa pagbaha.
Kini aron magamit ang calamity fund sa siyudad diha sa pag-rehabilitate sa mga nagubang imprastraktura, mahatag ang dugang mga relief goods sa nabiktimang indibidwal, lakip na ang livelihood assistance.
Lauman matud pa nga sulod ning semanaha, mag-convene ang Sanguniang Panglungsod aron mabuhatan kini ug resolusyon, og ma-aprubahan sa Mayor ang hingpit nga pagpailalom sa state of calamity sa dakbayan.
Sa pagkakarun duna napoy Low Pressure Area kon LPA ang gilaumang mohapak sa Caraga hinungdang gi-abisuhan ang tanan sa magma-igmat.
Samtang walay abisu usab sa pagtangtang sa suspension sa klase sa siyudad hinungdang hangtud karung adlawa, magpabiling epektibo ang maong kamanduan.
