BUTUAN CITY – Gipasakaan na og mga kasong graft og malversartion sa Office of the Ombudsman-Mindanao si kanhi Cabadbaran City Mayor Dale Corvera tungod sa ilegal nga pag-reimbursement sa iyang mga personal nga gasto.
Sa duha ka managlahing kaso, gi-akusahan sa Ombudsman si Corvera nga mipahimulos sa iyang posisyon diha sa paggamit sa pundo sa katawhan.
Gika-ingong naka-claim matud pa si Corvera og kinatibuk-ang 362-mil, 145-pesos og 85-sentabos nga reimbursements alang sa kwartang iyang gigamit sa iyang mga biyahe uban sa iyang asawa tali niadtong Mayo 5, 2011 hangtud Hunyo 26, 2014.
Lakip niini ang iyang nagasto sa pagtambong sa mga kalihukan sa Boy Scout of the Philippines didto sa kauluhang Manila, sama sa ilang pagkaon, hotel accommodation, bayad sa eroplano og uban pang mga travel expenses sa Cebu City.
Sa pagsusi sa iyang pagpasabot, gibutyag sa Ombudsman nga ang public character sa Boy Scouts of the Philippines dili mahimong gamitong balidong justification aron mu-claim sa nagastong pundo sa publiko tungod lang sa pagtambong sa maong mga kalihukan.
Hinuon, gitugutan sa korte ang iyang pagpyansa og 40-mil pesos alang sa iyang kasong malversation og 30-mil pesos sa kasong graft. (Beth Ruiz)
