BUTUAN CITY – Padayon pang gi-imbestigahan sa kapulisan sa Talacogon,A gusan del Sur ang pagpusil-patay sa usa ka drug personality nga binuhatan sa usa sa riding in tandem suspects samtang nag-istambay sa usa ka Bus Terminal kagahapon sa alas 4:35 sa hapon.
Naila ang biktima nga si Ronaldo Otaza alyas Tangkard, minyo, residente sa Purok Flordelis, San Agustin, Talacogon ning lalawigan sa Agusan del Sur.
Nasayrang samtang nag tindog-tindog ang biktima sa Talagocon Integrated Bus Terminal, gipusil kini sa makaduha sa iyang ulo gamit ang .45 kalibre nga pistola rason sa hinanaling kamatayon niini.
Sumala sa mga nakakita, nagsul-ob ug kalo, naka-jacket og nakasuot og color brown nga cargo shortpants ang mga suspek kinsa mipatoratoy pagsibat padulong sa wala matino nga direksyon gamit ang kolor itom nga motorsiklo.
Sigon ni SPO3 Abelardo Labis gikan sa Talacogon Municipal Police Station, bag-o pa lang nga mitahan sa otoridad ang biktima isip drug personality sa ilang lugar.
Narekober sa crime scene ang duha ka mga basiyo sa nasangpit nga armas. (Kriz Maravilla)
