BUTUAN CITY – Gikustudiya na sa Butuan City Police Station-2 ang duha ka lalaki nga dunay kalabutan sa reklamong pagpanglugos sa ilang ka-inum nga 23-anyos nga dalaga kagabii sa may Barangay Doongan ning dakbayan sa Butuan.
Naila ang duha ka suspek nga sila Richard Bogwak, 27-anyos ug Rotelio Remulta, 26-anyos parehong residente sa maong dapit nga mga silingan lang sa wala na panganling reklamante.
Base sa impormasyong gipaabot ning sibyahan sa alyas Jane, igsoon sa biktima, nga mga alas 9:00 kagabii matud pa gihagad ang iyang maguwang ug inom sa ka-brod niini sa fraternity didto sa panimalay nila Richard Bogwak.
Sa dihang nahubog matud pa ang biktima, dunay namatikdang mipatong kaniya ug nagpahimulos sa iyang pagkababaye. Apan dili matud pa maseguro niini kung kinsa ang nihilabot kaniya tungod sa kanget-nget sa kwarto diin siya nakatulog.
Bandang alas 12:15 sa kaadlawon usab nakapauli ang biktima nga naghilak ug nag-wild matud pa sa iyang kwarto tungod sa maong hitabo.
Walay lipod-lipod usab nga gibutyag ni alyas Jane nga gipagamit sa mga suspetsado ang iyang ate ug shabu nga parehong gilimod sa mga suspek.
Gi-angkon mismo ni Rotelio Remulta, usa sa mga gi-akusahang naglugos sa ilang ka-inum, nga nahilabtan niya ang reklamante apan dili matud pa kini makonsiderang lugos tungod kay wala niya kini gipugos.(rolan)
